A edición 2023 do festival de recreación histórica “Friulio” terá lugar os días 13 e 14 de maio. Chegamos á V edición.

O ambiente e o entretemento están garantidos grazas á colaboración de máis de 30 asociacións, tanto do “mundo romano” como do “mundo castrexo”, aínda que predominan estas últimas.

Numerosas actuacións musicais, pasacalles e obradoiros amenizarán as noites, coas principais actividades de recreación histórica centradas no paseo do río Narla.

Friol é un concello da provincia de Lugo, con moita historia, onde podemos atopar vestixios megalíticos e castrais. A posterior presenza de habitantes do mundo romano e visigodo fixo que tamén deixaran as súas pegadas nestas terras.

Durante a Idade Media, varias familias, Ulloa, Parga e Seixas, compartiron o poder nesta zona. Boa mostra diso son as edificacións, torres e castelos que poboan o territorio: a Torre de Friol, a Fortaleza de San Paio de Narla, a Torre de Miraz e o Pazo de Remesil e Trasmonte.

O edificio máis coñecido de Friol é a fortaleza de San Paio de Narla, de orixe descoñecida e reconstruída no século XVI, e sobre a que hai moitas lendas populares relacionadas con ela e os seus propietarios, os Vázquez de Seixas. A esta mesma estirpe tamén pertencía o Pazo do Monte, situado nesta mesma localidade.